Leichte SpracheDeutschEnglishTürkçeShqiptarArabischKurdî

Şêwirdariya di rêya înternet re çi ye?

Şêwirdariya di rêya înternet re çi ye?

Dibe ku ev hatibe serê te: astengî û derd û êşên te li malê û li dibistanê hene, xeberên ne xweş ji te re tên gotin, bi te de dixeyidin, ji ber ku rengê çermê laşê cuda ye, yan jî dibe ku te lêdan xwariye û carne tu dibêjî xwe: Ma gelo ez dîn im? Tu gelekî dixwazî li ser van tiştan biaxivî, lê tu û dayik û bavê xwe (halê hazir) ne li hev in û navbera te û hevala te ya herî baş jî ne xweş e. Dibe ku tiştek hebe jî, ku hêj ji binî te ji kesekî re negotiye û behs nekiriye, lê ew tişt her û her li bîra te ye û ji serê te dernakeve.

Heger tu bibînî, ku tu bê kes û karî, û tu kes li te nabe xwedî, û eger kesek tune be, ku  tu karibî pê re biaxivî û derdên xwe çareserî bikî, wî çaxî tu dikarî berê xwe bidî cihekî şêwirdariyê. Lê gelek caran, merov bi xwe re nabîne, ku telefûnekê jî bike.

Behweriya te bi te nayê, ku tu telefûna wî cihê şêwirdariyê bikî, ji ber ku te hêj tiştên wisa nekirine. Ji ber ku tu nizanî dema tu telefûnê bikî, tu dê çi bêjî. Û ji te re gelekî bi zehemt tê, ku tu bi kesekî re li ser van tiştan biaxivî.

Dibe ku her ji boy vî tiştî ji te re baş be, ku tu ji me re binivîsî yan mektûbekê ji me re bişînî! Tiştê baş ew e, ku tu karibî pêşî her tiştên di dilê xwe de binivîsî û hêdî tu kengî wê nivîsa xwe ji me re bişînî, di destê te de ye. Dergehê cihê şêwirdariya me di înternetê de baş parastî ye (SSL-Verschlüsselung). Ne her kes dikare derbasî malpera me di înternet de bibe. Ji ber vê yekê, bila dilê te di cih de be, ku tiştê tu ji me re dinivîsî, nakeve nav destên kesekî din û kesek pê nizane, ku te nivîsek ji me re şandiye. Û kesek pê nizane, ku te çi ji me re nivîsiye.

Taku şêwirdarî parastî be, anku kesekî din pê nizanibe, divê tu navekî suxte (Benutzername) û gotineke veşartî (Passwort) ji xwe re çê bikî. Tu dikarî bi alîkariya wan hercar derbasî malperê (cihê şêwirdariyê) bibî û bersivên me ji te re nivîsandine bixwînî. Lê tiştê muhm ew e, ku tu gotina veşartî baş biparêzî. Gotina veşartî di Kompiyûter de hîç qeyd neke û tu carî jî nede kesekî din.

Em ji aliyê xwe ve hewl didin, ku di navbera 2 heta 3 rojan de bersiva pirsan bidin.

Dibe ku em hindek caran nikaribin zû bersiv bidin, ji ber vê yekê dê baş be, eger tu şert û mercên bikaranîna malpera me (cihê şêwirdariyê die înternet de) bixwînî!

… Agehdariyeke din ya giring:

Eger hindek caran merov tu çareyan ji xwe re nebînin û jiyan ji wan re dijwar xwiya bike û dem û dewran li serê wan bigerin, merov hindek caran mirinê tînin bîra xwe. Eger merov nema karibin tehda û zordestiyê û bêbextiyê û kul û êş û derdan tehmul bikin, wî çaxî merov ji xwe re dibêjin, mirin ji her tiştî baştir e. Mirin bi merovan xweş dibe. Lê di rewşeke wisa de, mesela ne mesela mirin û kuştinê ye, divê merov dawî li wan tiştan bînin, ew tiştên ku merov nema dikarin tehmula wan bikin.
Dibe ku tu jî di rewşeke wisa de bî. Dibe ku tu jî difikirî û ji xwe re dibêjî, ku jiyana te bê fêda ye û tu dixwazî dev ji vê jiyanê berdî. Tu dikarî van tiştan hemiyan ji me re binivîsî. Emê hêdî guh bidin te û hey ji te hebin û alîkariya te bikin, taku tu ji vê rewşa xerab derkevî û karibî jiyaneke baştir ji xwe re derbas bikî. Eger tu aşkere ji me re bêjî, ku tu dixwazî xwe bikûjî, divê em hingî ji boy parastina te û herweha ji boy parastina xwe jî tevbigerin û ji dil xwedî li te derkevin. Heger tiştekî wisa hebe, divê em alîkariyekê yan çareseriyekê ji te re peyda bikin. Ji ber ku helbet em naxwazin, ku tu xwe bikûjî!
Û helbet emê heman alîkariyê û çareseriyê ji te re peyda bikin, eger tu ji me re binivîsî, ku tu plana ziyaneke mezin dikî û tu jiyana xwe û ya hindek merovên din bikî xeteriyê.

© Mädchenhaus Bielefeld e.V. (Komeleya mala keçan li Bielefeld)